ஒரு மனிதன். ஒரே ஒரு மனிதன். சினிமா உலகின் வழக்கமான கூட்டு உழைப்பைத் தவிர்த்து, முழு நீளத் திரைப்படத்தைத் தனியாக உருவாக்கி உலகையே வியக்க வைக்கும் அபூர்வ சாதனை. சங்ககிரி ராஜ்குமார் என்ற ஒற்றை நபர், ‘ஒன் மேன்’ என்ற தனது படைப்பின் மூலம் அந்த சாதனையை நிகழ்த்தியிருக்கிறார். இது வெறும் படம் அல்ல; மனித முயற்சியின் உச்சத்தைக் காட்டும் ஒரு அனுபவம்.
கதை, திரைக்கதை, வசனம், இயக்கம், ஒளிப்பதிவு, இசை, படத்தொகுப்பு என ஒரு முழுமையான பட்டியலை டி.ராஜேந்தர் படங்களில் நாம் பார்த்திருக்கலாம். ஆனால் அதைக் கடந்து, கற்பனைக்கும் எட்டாத அளவில், தொழில்நுட்பப் பணிகள் மட்டுமல்லாமல், படத்தில் தோன்றும் ஒவ்வொரு கதாபாத்திரத்திலும் தானே நடித்து, பின்னணி வேலைகள் உள்பட அனைத்தையும் தனிப்பட்ட முறையில் செய்து, ஒரு முழுப்படத்தையும் உருவாக்கியிருக்கிறார் சங்ககிரி ராஜ்குமார்.
உலகின் எந்த சினிமாத் துறையிலும், ஹாலிவுட் உட்பட, இதுவரை முயற்சிக்கப்படாத இந்த சாதனைப் பயணத்தை வெற்றிகரமாக நிறைவு செய்து, உலகத்தையே பிரமிக்க வைக்கும் விதத்தில் தனி நபராக இப்படத்தை உருவாக்கியிருக்கும் சங்ககிரி ராஜ்குமார், கதைக்களத்தையும் காட்சிகளையும் கையாண்ட விதம் ஆச்சரியமூட்டுகிறது.
கார் துரத்தல், ஹெலிகாப்டர் சாகசம், ரயில் அதிரடி, விமானப் பயணம் என பல்வேறு பெரும் காட்சிகளை கணினி கிராபிக்ஸ் மூலம் உருவாக்கியிருந்தாலும், அவற்றுக்கான பின்னணியில் தனி ஒருவராய் அவர் செலுத்திய கடுமையான உழைப்பு திரையில் தெளிவாகத் தெரிகிறது.
நான்கு நண்பர்களும் ஒரு கார் ஓட்டுநரும் அடங்கிய ஐந்து பேர் கொண்ட குழுவின் பயணத்துடன் தொடங்கும் கதை, மனித பேராசையால் உயிரினமே இல்லாமல் உலகம் அழியும் அபாயத்தை உருவாக்கும் ஒரு கண்டுபிடிப்பின் ரகசியத்தை வெளிப்படுத்துகிறது. அதைப் பயன்படுத்தி பத்து நாட்கள் உலகையே ஆள வேண்டும் என்ற நான்கு நண்பர்களின் ஆசை நிறைவேறுகிறதா? யாருமே இல்லாத உலகில் தனியாக வாழத் துடிக்கும் நாயகனின் ஆசையின் பின்னால் எத்தகைய ஆபத்து மறைந்திருக்கிறது என்பதை விவரிக்கும் கதையாக இது அமைகிறது.
இத்தகைய கதையை வைத்து உலகெங்கும் சுற்றும் முயற்சியை அமெரிக்காவுடன் நிறுத்தி, மீண்டும் தமிழகம் நோக்கி திரும்பும் பயணத்துடன் கதையை முடிக்கும் சங்ககிரி ராஜ்குமாரின் இந்த சாதனை முயற்சியை தமிழ் சினிமா மட்டுமல்ல, ஒட்டுமொத்த இந்திய சினிமாவும் கொண்டாட வேண்டும்.
இப்படி ஒரு திட்டத்தை நினைப்பதே பெரும் சவாலாக இருக்கும்போது, அதைத் தனியாக செயல்படுத்திய சங்ககிரி ராஜ்குமார், தேவையான கருவிகளைத் தானே உருவாக்கி, அவற்றின் மூலம் காட்சிகளைப் படமாக்கிய விதம் வியப்பளிக்கிறது. கூட்டம் நிறைந்த திரையரங்கக் காட்சியில் கூட பலவிதமான உடைகளில் தானே நடித்தது, வனப்பகுதியில் படமாக்கப்பட்ட மக்கள் தொகை அதிகம் உள்ள காட்சிகள் என அனைத்தையும் பிரமிக்கத்தக்க முறையில் கையாண்டு பாராட்டைப் பெறுகிறார்.
கிராபிக்ஸ் காட்சிகளே படத்தின் முக்கிய அம்சமாக இருந்தாலும், அவற்றின் தரம் சற்று குறைவாகவே உள்ளது. இருந்தபோதிலும், இத்தகைய ஒரு முயற்சியில் அந்த குறை கண்ணுக்குத் தெரியாத அளவுக்கு, தனி ஒருவரால் எப்படி இப்படி ஒரு படத்தை உருவாக்க முடியும் என்ற கேள்வியை நம் மனதில் எழுப்பும் வகையில் படத்தை வடிவமைத்திருக்கிறார் ஒன் மேன் சங்ககிரி ராஜ்குமார்.
தமிழகத்தில் மட்டுமல்ல, அமெரிக்காவிலும் தனியாகக் காட்சிகளைப் பதிவு செய்து, கிராபிக்ஸ், ஒளிப்பதிவு, இசை, படத்தொகுப்பு உள்ளிட்ட அனைத்து தொழில்நுட்பப் பணிகளையும் தனியாக மேற்கொண்டிருக்கும் அவரது ‘ஒன் மேன்’ படம், சினிமா ரசிகர்களை மட்டுமல்ல, சினிமா மீது ஆர்வமில்லாதவர்களையும் கூட வியப்பில் ஆழ்த்தும் வல்லமை கொண்டது.
