ஒவ்வொரு படமும் ஒரு நல்ல படமாக அமைய வேண்டும் – விக்ரம் பிரபு

 “சிறை’ என் 25வது படம். தாத்தாவும், அப்பாவும் தங்களின் முதல் 25 படங்களில் பல பெரிய வெற்றிகளைப் பெற்றவர்கள். நான் அந்த அளவுக்கு இன்னும் சாதிக்கவில்லை என்பதே உண்மை. ஆனாலும், எனக்கு முக்கியமானது என்னவென்றால் — நான் நடிக்கும் ஒவ்வொரு படமும் ஒரு நல்ல படம் ஆக வேண்டும் என்பதுதான். அது வெற்றி பெற்றாலும், தோல்வியடைந்தாலும், நல்ல படமாக இருந்தாலே திருப்தியாக இருக்கும்.”

இதுவும் ஒரு போலீஸ் கதாபாத்திரம் தான். ஆனால் சுவாரஸ்யம் என்னவென்றால் — நான் இனி போலீஸ் வேடம் செய்யவே கூடாது என்று முடிவு செய்த பிறகுதான் இந்த கதை வந்தது. ‘டாணாக்காரன்’ பட இயக்குநர் தமிழ் இந்த கதையை எழுதும்போது என்னை நினைத்து எழுதவில்லை. ஆனால் அவர் சொன்னார், ‘இந்த கதாபாத்திரத்துக்கு உயிர் கொடுக்க முடியும் நடிகர் நீங்கள்தான்!’ — அதுதான் என்னை உருக்கி இப்பணியை ஏற்க வைத்தது.”

‘டாணாக்காரன்’ படத்தில் பயிற்சி போலீஸாக இருந்தேன், அதனால் எடை குறைத்தேன். *சிறை*யில் முழுநேர அதிகாரி என்பதால் எடை கூட்டி நடித்தேன். இது உடல் ரீதியாக ஒரு புதிய அனுபவம். ஒவ்வொரு வேடத்துக்கும் என்னை மாற்றிக் கொள்ளும் சவாலை நான் ரசிக்கிறேன்.”

தெலுங்கில் நடித்த ‘காட்டி’ படம் எனக்கு நல்ல பெயர் கொடுத்தது. அதில் நான் டப்பிங் பேசியதே மிகுந்த மகிழ்ச்சி. அனுஷ்காவுடன் வேலை செய்தது ஒரு அழகான அனுபவம் — அவர் மிகவும் மனம் திறந்தவர், இரக்கமுள்ளவர். தெலுங்கு பக்கம் இன்னும் வாய்ப்புகள் வருகின்றன. ஆனால் இனி கதைகளை நன்கு தேர்வு செய்து நடிக்க முடிவு செய்துள்ளேன்.”

இயக்குநர் தமிழ் அவர்களின் வாழ்க்கையில் நடந்த ஒரு உண்மை சம்பவத்தை மையமாகக் கொண்ட கதை இது. அந்த நம்பிக்கையால்தான் இந்த படம் எனக்கு மிகவும் நெருக்கமானது. மேலும், இயக்குநர் சுரேஷ், அவர் வெற்றிமாறனின் இணை இயக்குநராக பல வருடங்கள் பணியாற்றியவர் — அவரது அனுபவம் மிகத் தெளிவாக இந்த படத்தின் கதை சொல்லும் பாணியில் தெரிகிறது.

தயாரிப்பாளர் எஸ்.எஸ். லலித்குமார் அவர்களின் மகன் எல்.கே. ஆக்ஷய் குமார் இந்த படத்தில் நடித்திருக்கிறார். மிகவும் ஆர்வமுள்ளவர். அவரின் உழைப்பு, ஈடுபாடு எனக்கு நன்றாகத் தெரிந்தது. புதியவராக இருந்தாலும், சிறப்பாக நடித்திருக்கிறார்.

இயக்குனர் தமிழ் அவர் வாழ்க்கையிலிருந்து கதையை எடுத்திருப்பதால், அவரது உடல்மொழி, பேசும் ரீதிகள், சிந்தனை — இதையெல்லாம் கவனித்துச் செய்தேன். இயக்குநர் சொன்னபடி, ஆனால் மனதிலிருந்து உணர்ந்தபடி நடித்தேன். இதுவே எனக்கும் ரசிகர்களுக்கும் புதிய அனுபவமாக இருக்கும்.

பலர் கேட்கிறார்கள் ‘க்ரைம் படங்கள் மாதிரியானக் கதைகளில் தான் நடிக்கிறீர்கள்?’ என்று. ஆனால் எனக்கு எல்லா விதமான கதாபாத்திரங்களிலும் நடிக்க வேண்டும் என்பதே ஆசை. எந்த வகை கதையாயினும், அதை உண்மையாகச் செய்தால் அதுவே நடிப்பு. அடுத்தடுத்த படங்களில் இன்னும் பல்வேறு வகைகளில் நடித்து காட்டுவேன்.”

 

முதல் 25ல் நான் நிறைய கற்றுக் கொண்டேன். அடுத்த 25ல் ஏதாவது ஒரு புதிய மைல்கல்லை அடைய வேண்டும் என்று விரும்புகிறேன். அதற்காக நான் தொடர்ந்து பாடுபட்டு கொண்டிருக்கிறேன்,” என்றார்.