காதல் என்பது ஒரு குறிப்பிட்ட காலத்துக்குள் முடிந்துவிடும் உணர்வு அல்ல, அது காலங்களையும் கடந்து பயணிக்கக்கூடியது என்பதை, மனித வாழ்க்கை மற்றும் அனைத்து உயிர்களின் மீதான அன்பையும் இணைத்து வித்தியாசமான கற்பனை உலகில் சொல்லியிருக்கும் திரைப்படம் ‘ஏழு கடல் ஏழு மலை’.
ராம் இயக்கத்தில், நிவின் பாலி, சூரி, அஞ்சலி உள்ளிட்டோர் நடித்திருக்கும் இப்படத்திற்கு யுவன் சங்கர் ராஜா இசையமைத்திருக்கிறார். என்.கே. ஏகாம்பரம் ஒளிப்பதிவு செய்திருக்கிறார். வழக்கமான காதல் கதையாக இல்லாமல், ஃபேண்டஸி பின்னணியில் ஆழமான மனித உணர்வுகளையும் வாழ்க்கை குறித்த சிந்தனைகளையும் பேசும் படமாக உருவாகியிருக்கிறது.
சுமார் 8,000 ஆண்டுகளாக வாழ்ந்து வரும் மர்ம மனிதராக இருக்கிறார் நிவின் பாலி. ஆயிரக்கணக்கான ஆண்டுகளைக் கடந்து வாழ்ந்தாலும், அஞ்சலி மீதான அவரது காதல் மட்டும் மாறாமல் இருக்கிறது. பல பிறவிகளைக் கடந்து தொடரும் அந்தக் காதலைத் தேடி அலைந்து கொண்டிருக்கும் நிவின் பாலி, ஒரு ரயில் பயணத்தில் சூரியை சந்திக்கிறார்.
வெளிநாட்டில் வேலை பார்த்துவிட்டு தீபாவளிக்காக சொந்த ஊர் திரும்பும் சாதாரண மனிதராக சூரி இருக்கிறார். ரயிலில் நிவின் பாலியை சந்திக்கும் அவர், ஆரம்பத்தில் அவரது வித்தியாசமான தோற்றத்தையும் பேச்சையும் புரிந்து கொள்ள முடியாமல் தயங்குகிறார். ஆனால், இருவருக்கும் இடையே நடைபெறும் உரையாடல்கள் மூலம் நிவின் பாலியின் வாழ்க்கை, காதல் மற்றும் அவர் கடந்து வந்த காலங்கள் மெல்ல விரிகின்றன.
நிவின் பாலி தனது காதலியை தேடி அலைவதற்கான காரணம் என்ன ? பல ஆயிரம் ஆண்டுகளைக் கடந்தும் அந்தக் காதல் ஏன் தொடர்கிறது ?. மறுபுறம், தனது குடும்பத்தை மட்டுமே நினைத்து வாழும் சூரியின் பார்வையில் இந்தப் பயணம் என்ன மாற்றத்தை ஏற்படுத்துகிறது ?, இவர்களுடன் பயணிக்கும் ஒரு சிறிய உயிரின் வாழ்க்கையும் மனித வாழ்க்கைக்கு இணையான மதிப்புடையது என்பதை உணர்த்தும் சம்பவங்கள் என்ன? என்பதற்கான பதில்களை காதல், மனிதநேயம் மற்றும் தத்துவ சிந்தனைகளுடன் கதை நகர்த்துகிறது.
ராம் படங்களில் எப்போதும் மனிதர்களின் வாழ்க்கையைத் தாண்டி அவர்களைச் சுற்றியிருக்கும் சமூகத்தையும், மனித உணர்வுகளையும் கேள்விக்கு உட்படுத்தும் அம்சம் இருக்கும். அந்த வகையில், ‘ஏழு கடல் ஏழு மலை’ படத்திலும் காதலை மட்டுமே பேசாமல், மனிதன் இயற்கையோடும் மற்ற உயிர்களோடும் கொண்டிருக்கும் உறவையும் மையப்படுத்தியிருக்கிறார். “இந்த உலகம் மனிதர்களுக்கு மட்டுமே சொந்தமானது அல்ல” என்ற கருத்தை கதையின் பல இடங்களில் அழுத்தமாக பதிவு செய்திருப்பது படத்தின் முக்கியமான சிறப்பு.
குறிப்பாக, ஒரு ரயில் பயணத்தை மையமாக வைத்து கதை தொடங்கினாலும், உரையாடல்கள் வழியாக ஆயிரக்கணக்கான ஆண்டுகளைக் கடந்து செல்லும் ஒரு மிகப்பெரிய உலகத்தை உருவாக்கியிருப்பது இயக்குநர் ராமின் கதை சொல்லும் திறமைக்கு சான்றாக இருக்கிறது. நிகழ்கால வாழ்க்கை, பழங்காலம், காதல், பிறப்பு, மரணம், மனிதர்களின் சுயநலம் என பல விஷயங்களை ஒரே கதைக்குள் இணைத்து பார்வையாளர்களை சிந்திக்க வைக்கிறார்.
அதே நேரத்தில், வழக்கமான வணிகத் திரைப்படங்களுக்கான வேகத்தையோ, நேரடியான கதை சொல்லலையோ எதிர்பார்க்கும் ரசிகர்களுக்கு படம் சற்று மாறுபட்ட அனுபவமாக இருக்கலாம். பல்வேறு கருத்துகளை ஒரே கதைக்குள் சொல்ல முயற்சிப்பதால் சில இடங்களில் திரைக்கதை மெதுவாக நகர்ந்தாலும், படத்தின் மையக் கருத்துகளும் கற்பனை உலகமும் அந்தக் குறையை பெரிதாக உணர விடாமல் செய்கின்றன.
ஆயிரக்கணக்கான ஆண்டுகளாக காதலை சுமந்து செல்லும் மனிதராக நிவின் பாலி தனது கதாபாத்திரத்திற்கு சிறப்பான உயிர் கொடுத்திருக்கிறார். காதலின் மீதான ஏக்கம், தனது காதலியைத் தேடும் தவிப்பு, கோபம், வலி என பல்வேறு உணர்வுகளை முகபாவனைகளின் மூலமே வெளிப்படுத்துகிறார். நீண்ட தலைமுடி, தாடி என அவரது தோற்றமும் கதாபாத்திரத்தின் மர்மத்தன்மைக்கு பொருத்தமாக அமைந்திருக்கிறது.
சூரி வழக்கமான நகைச்சுவை கதாபாத்திரங்களில் இருந்து விலகி, குடும்பத்தின் மீது அக்கறை கொண்ட ஒரு சாதாரண மனிதராக நடித்திருக்கிறார். நிவின் பாலியுடன் அவர் நடத்தும் உரையாடல்களும், அவர்களுக்கிடையே உருவாகும் உறவும் படத்தின் சுவாரஸ்யமான பகுதிகளில் ஒன்றாக இருக்கிறது. அவரது இயல்பான உடல்மொழியும், அப்பாவித்தனமான நடிப்பும் பல காட்சிகளுக்கு உயிர் கொடுக்கிறது.
நிவின் பாலியின் நீண்ட காலக் காதலியாக நடித்துள்ள அஞ்சலி வழக்கம் போலவே மிகவும் இயல்பாக நடித்திருக்கிறார். அதிகமான வசனங்கள் இல்லாவிட்டாலும், கண்கள் மற்றும் முகபாவனைகள் மூலமாக காதலின் ஆழத்தை வெளிப்படுத்துகிறார். குறிப்பாக நிவின் பாலியுடன் இணைந்து வரும் காட்சிகளில் அவரது நடிப்பு மென்மையாகவும் உணர்வுப்பூர்வமாகவும் அமைந்திருக்கிறது.
ஒளிப்பதிவாளர் என்.கே. ஏகாம்பரத்தின் கேமரா, படத்தின் கற்பனை உலகிற்கு மிகப்பெரிய பலமாக அமைந்திருக்கிறது. ரயில், காடு, மலை, கடல் என மாறுபட்ட நிலப்பரப்புகளை அழகாக காட்சிப்படுத்தியிருப்பதுடன், கதையின் ஃபேண்டஸி தன்மையையும் காட்சிகளுக்குள் கொண்டு வந்திருக்கிறார். யுவன் சங்கர் ராஜாவின் இசையும் படத்தின் காதல் மற்றும் உணர்வுப்பூர்வமான காட்சிகளுக்கு கூடுதல் பலம் சேர்க்கிறது. குறிப்பாக பின்னணி இசை பல இடங்களில் காட்சிகளின் உணர்வை மேலும் உயர்த்துகிறது.
காதல் என்பது இரு மனிதர்களுக்கு இடையேயான உறவு மட்டுமல்ல, இந்த உலகில் வாழும் அனைத்து உயிர்களிடமும் இருக்க வேண்டிய அன்புதான் என்பதை அழுத்தமாக சொல்லும் ‘ஏழு கடல் ஏழு மலை’, வழக்கமான காதல் படங்களிலிருந்து முற்றிலும் மாறுபட்ட அனுபவத்தை கொடுக்கிறது. நிவின் பாலி – அஞ்சலியின் காலம் கடந்த காதல், சூரியின் இயல்பான நடிப்பு, ராமின் தனித்துவமான கதை சொல்லல் மற்றும் அழகான ஒளிப்பதிவு ஆகியவை படத்தின் பலமாக இருக்கின்றன. சினிமா என்பது பொழுதுபோக்கைத் தாண்டி சில விஷயங்களை நம்மை சிந்திக்க வைக்க வேண்டும் என்று நினைக்கும் ரசிகர்களுக்கு ‘ஏழு கடல் ஏழு மலை’ நிச்சயம் மனதில் நிற்கும் ஒரு திரைப்படம்.
