பியார் பிரேமா கல்யாணம், இளன் இயக்கத்திலும் நடிப்பிலும் வெளியாகியிருக்கும் இந்தத் தமிழ்ப் படம், அவரது முந்தைய வெற்றிப்படமான பியார் பிரேமா காதலின் தொடர்ச்சியாக வருகிறது. காதலின் இனிமையை வெற்றிகரமாக சித்தரித்த இயக்குநர், இப்போது திருமண வாழ்க்கையின் சிக்கல்களை நகைச்சுவை கலந்து சொல்ல முயன்றிருக்கிறார். ஆனால் அந்த முயற்சி முழுமையாக வெற்றி பெறாமல், சில இடங்களில் தடுமாறியிருக்கிறது.
நாயகன் இளனும் நாயகி சான்வி மேக்னாவும் காதலித்து, இரு குடும்பங்களின் ஒப்புதலுடன் திருமணம் செய்கிறார்கள். விழா முடிந்த சில நிமிடங்களிலேயே மணப்பெண் சான்வி, மணக்கோலத்திலேயே மண்டபத்தை விட்டு ஓடிவிடுகிறார். காரணம் தெரிந்தால் ஆச்சர்யம்தான் – பெற்றோரைப் பிரிய மனமில்லாததால். கணவர் மற்றும் பெற்றோர் அறிவுரை சொன்னாலும், அவர் கேட்க மறுத்து, “திருமணத்திற்குப் பிறகு பெண் ஏன் கணவர் வீட்டுக்குப் போக வேண்டும்? கணவர் தானே மனைவி வீட்டுக்கு வரலாம்” என்று பெண்ணியக் கருத்தை முன்வைக்கிறார். ஆரம்பத்தில் எதிர்த்த இளன், பின்னர் மனைவியின் விருப்பத்திற்கு இணங்கி அவள் வீட்டில் தங்கிவிடுகிறார். வேலையில்லாமல், மனைவியின் சம்பளத்தில், மாமியார் வீட்டில் வாழும் அவரது திருமண வாழ்க்கை இனிக்காதா, இனிக்காதா என்பதை நகைச்சுவையுடன் விவரிக்க முயன்றிருப்பதே இந்தப் படத்தின் மையம்.
பியார் பிரேமா காதல் மூலம் இயக்குநராக அங்கீகாரம் பெற்ற இளன், இப்படத்தில் இயக்குநராகவும் ஹீரோவாகவும் தன்னை நிலைநிறுத்த முயன்றிருக்கிறார். காதல் பகுதியை அழகாகக் கையாண்ட அவர், திருமண வாழ்க்கையின் சிக்கல்களைச் சரியாகக் கையாள முடியாமல் சிறிது தடுமாறியிருக்கிறார். நாயகனாக அறிமுகமான இளன், தனது வயதுக்கு ஏற்ற துள்ளலான நடிப்பால் கதாபாத்திரத்திற்கு நியாயம் செய்திருக்கிறார். பொறுப்பற்ற மகன், இனிமையான காதலன், மாமியார் வீட்டு மருமகன் என பல பரிமாணங்களை இயல்பான நடிப்பால் வெளிப்படுத்தி பார்வையாளர்களைக் கவர்ந்திருக்கிறார். நாயகியாக வரும் சான்வி மேக்னா, துள்ளலான நடிப்பு மற்றும் கவர்ச்சிகரமான தோற்றத்தால் கவனம் ஈர்க்கிறார். நாயகனுக்கு இணையான பாத்திரத்தில் கொடுக்கப்பட்ட வேலைகளைத் திறம்படச் செய்திருப்பதோடு, பல காட்சிகளை அசாத்தியமாகக் கையாண்டு பாராட்டு பெறுகிறார். அம்மாவாக நடிக்கும் ராதிகா, முதன்மை கதாபாத்திரங்களுக்கு இணையாக இயல்பான நடிப்பால் ஈடுகொடுக்கிறார். எம்.எஸ்.பாஸ்கர், செந்தில், கீதா கைலாசம், இளங்கோ குமரவேல் போன்றோரின் பாத்திரங்கள் அறிவுரை கூறவும் கதையை முன்னெடுக்கவும் உதவுகின்றன. யோகி பாபுவின் சில காட்சிகள் சிரிக்க வைக்கின்றன; மாறனின் நகைச்சுவை அவ்வளவாகப் பலன் தரவில்லை.
ஒளிப்பதிவாளர் தினேஷ் கே.பாபுவின் பணி வண்ணமயமாகவும் ரசனையுடனும் அமைந்திருக்கிறது. நட்சத்திரங்களை அழகாகப் படம்பிடித்திருப்பதோடு, மொட்டை மாடி மற்றும் நாயகியின் வீட்டை மையமாக வைத்து பெரும்பாலான காட்சிகளை ரசிக்கும்படி எடுத்திருக்கிறார். யுவன் சங்கர் ராஜாவின் பாடல்கள் மனதில் ஆழமாகப் பதியவில்லை; ஆனால் பின்னணி இசை அளவுடன் பயணித்து காட்சிகளுக்கு வலு சேர்த்திருக்கிறது. தொகுப்பாளர் பிரதீப் இ.ராகவ், காதலோடு செல்லும் முதல் பாதியை ரசமாகத் தொகுத்திருந்தாலும், திருமண வாழ்க்கையை விவரிக்கும் இரண்டாம் பாதியில் திரைக்கதை தொய்வு உணரப்படுகிறது.
திருமண வழக்கத்தை மாற்றும் நிவேதிதா போஹங்கர் கதையின் சுவாரஸ்யம் திரைக்கதையில் முழுமையாக வெளிப்படவில்லை. மனைவி வீட்டில் கணவர் தங்குவதும், பெண்கள் எதிர்கொள்ளும் சிக்கல்களை ஆண்கள் எதிர்கொள்வதுபோல் அமைக்கப்பட்ட காட்சிகளும் படத்திற்கு உதவவில்லை; மாறாக சில இடங்களில் பார்வையாளர்களை எரிச்சலடையச் செய்கின்றன. கூடுதல் திரைக்கதை எழுதி இயக்கிய இளன், காதலைத் திறமையாகக் கையாண்டதுபோல் திருமண வாழ்க்கை மற்றும் அதன் சிக்கல்களைச் சரியான முறையில் கையாளத் தவறியிருக்கிறார். முதல் பாதியில் காதல் காட்சிகளும் சமூக ஊடகங்களில் ஒரு விஷயம் எப்படிப் பரவுகிறது என்பதும் ரசிக்க வைத்தாலும், இரண்டாம் பாதியில் மாமியார் வீட்டு மருமகனின் திண்டாட்டமும் அதைச் சமாளிக்கும் முறைகளும் திரைக்கதையோடு ஒட்டாமல் போய் பார்வையாளர்களைச் சோர்வடையச் செய்கின்றன.
மொத்தத்தில், பியார் பிரேமா காதல் மூலம் இயக்குநராக வெற்றி பெற்ற இளன், இந்தப் படத்தில் ஹீரோவாக வெற்றி பெற்றிருந்தாலும் இயக்குநராக சற்று பின்னடைவைச் சந்தித்திருக்கிறார்.
