தற்போதைய சூழ்நிலையில் ஒரு திரைப்படம் எந்த தங்கு தடையுமின்றி வெளிவருவது என்பது மிகப் பெரிய சாதனையாகிவிட்டது. படத்தை ஆரம்பிக்கும் போது எதையும் கண்டு கொள்ளாத சிலர், அந்தப் படத்தின் வெளியீட்டிற்கு சில நாள் முன்பாக எதிர்ப்பு, அறிக்கை, வழக்கு என படத்தை வெளிவராமல் தடுக்க பல வழிமுறைகளைக் கையாள்கிறார்கள்.
அந்த விதத்தில் சமீபத்தில் ‘கொம்பன்’ படத்தின் வெளியீட்டிற்கு முன்னதாக புதிய தமிழகம் கட்சியின் தலைவர் கிருஷ்ணசாமி படத்திற்கு எதிராக சென்சார் போர்டிடம் புகார் மனு கொடுத்தது, கண்டன அறிக்கை, வழக்கு என்ற பல ரூபங்களில் படத்தைத் தடுத்து நிறுத்தும் முயற்சியில் இறங்கினார்.
கடைசியில் தமிழ்த் திரைப்படக் கூட்டமைப்பு சார்பாக தயாரிப்பாளர்கள், வினியோகஸ்தர்கள், ஃபெப்சி, தியேட்டர்காரர்கள் ஆகியோருடன் இணைந்து படத்திற்கு எதிரான விஷயங்களை சமாளிப்போம், இனி இம்மாதிரியான விஷயங்கள் நடைபெறாமல் இருக்க, சட்டரீதியான அணுகுமுறையைத் தொடங்குவோம் என்று அறிவித்தார்கள்.
அதன் பின் நீதிமன்றத் தீர்ப்பின்படி ‘கொம்பன்’ திரைப்படம் வெளிவந்து தற்போது மாபெரும் வெற்றி பெற்று நல்ல வசூலுடன் ஓடிக் கொண்டிருக்கிறது. நேற்று அனைத்துத் தரப்பினருக்கும் நன்றி தெரிவிக்கும் விதமாக படத்தின் வெற்றிச் சந்திப்பு நடைபெற்றது.
அப்போது பேசிய தயாரிப்பாளர் கே.ஈ.ஞானவேல்ராஜா படத்தை முடக்குவதற்காக கிருஷ்ணசாமி செயல்பட்ட விதத்தில் நிறைய பண இழப்பு ஏற்பட்டதாகவும் அதை ஈடுகட்டும் விதத்தில் அவர் மீது வழக்கு தொடரப் போவதாகம் அறிவித்தார்.
“படத்திற்கான வழக்குச் செலவுகள் அனைத்தையும் நாங்களே ஏற்க வேண்டியதாக இருந்தது. ஒரு பொய்யான தகவலைப் பரப்பி படத்தை தடுத்து நிறுத்தும் முயற்சியில் அவர்கள் இறங்கியதன் விளைவாக சுமார் 100 திரையரங்குகளுக்கும் மேல் படத்தை வெளியிட முடியாமல் போனது. வெளிநாடுகளில் திரையிடுவதற்காக போட்ட ஒப்பந்தத்தின்படி படத்தைத் தர முடியாததால் அதிலும் குறிப்பிட்ட தொகையை நாங்கள் இழப்பீட்டுத் தொகையை தர வேண்டியதாயிற்று.
இப்போது ‘கொம்பன்’ படத்தின் மீது எந்தக் காரணத்திற்காக வழக்கு போட்டார்களா, அந்த ஊர்களில் எல்லாம் படம் நல்ல வரவேற்புடன் ஓடிக் கொண்டிருக்கிறது. என அவர்கள் சொன்னது போல எந்தப் பிரச்சனையும் ஏற்படவில்லை. எனவே எங்கள் மீது போட்ட வழக்கால் எங்களுக்கு இழப்பும், தேவையற்ற மன உளைச்சலும் ஏற்பட்டது. அதற்காக கிருஷ்ணசாமி மீது மானநஷ்ட வழக்கு தொடர உள்ளோம். அதற்கான வேலைகள் நடைபெற்று வருகின்றன. இந்த வழக்கில் தமிழ்த் திரைப்பட தயாரிப்பாளர் சங்கமும் ஒரு பிரதியாக இணைய உள்ளார்கள். எல்லோரும் என்னை புலி வாலை பிடித்து விட்டதாகச் சொல்கிறார்கள். கொம்பன் படத்தை விட்டு விட்டார்கள், இப்போது என்னை பிடித்துக் கொண்டுள்ளார்கள்,” என்று ஸ்டுடியோ க்ரீன் தயாரிப்பாளர் கே.ஈ.ஞானவேல்ராஜா பேசினார்.
