தமிழ் சினிமாவின் முன்னணி நடிகர்களில் ஒருவரான தனுஷின் 56வது திரைப்படம் பூஜையுடன் ஆரம்பமாகி உள்ளது.
‘லப்பர் பந்து’ படத்தின் மூலம் ரசிகர்களின் கவனத்தை ஈர்த்த இயக்குநர் தமிழரசன் பச்சமுத்து இப்படத்தை இயக்குகிறார். தனுஷ் – தமிழரசன் பச்சமுத்து கூட்டணி முதன்முறையாக இணையும் படம் என்பதால், இப்படத்தின் மீது ரசிகர்கள் மத்தியில் ஆரம்பத்திலேயே எதிர்பார்ப்பு உருவாகியுள்ளது.
சித்தாரா என்டர்டெயின்மென்ட்ஸ் நிறுவனம் சார்பில் தயாரிப்பாளர் நாக வம்சி, பிரைமார்க் புரொடக்ஷன்ஸ் நிறுவனம் சார்பில் ஹரிதா லிங்குசாமி மற்றும் ஸ்ரீகரா ஸ்டுடியோஸ் நிறுவனம் சார்பில் சாய் சௌஜன்யா ஆகியோர் இணைந்து இப்படத்தை தயாரிக்கின்றனர்.
இப்படத்தில் தனுஷ், எஸ்.ஜே.சூர்யா, வடிவேலு, விஜய்குமார், பிரித்தி முகுந்தன், காளி வெங்கட் உள்ளிட்டோர் இப்படத்தில் இணைந்துள்ளனர்.
இப்படத்திற்கு சாய் அபயங்கர் இசையமைக்கிறார். இளம் தலைமுறையில் தனது இசையின் மூலம் கவனம் ஈர்த்து வரும் சாய் அபயங்கர், தனுஷ் நடிக்கும் படத்திற்கு இசையமைப்பது படத்தின் மீதான எதிர்பார்ப்பை மேலும் அதிகரித்துள்ளது.
மதுரை அருகில் சிவகங்கை மாவட்டத்தில் உள்ள கருப்பணசாமி கோயிலில் நடைபெற்ற சிறப்பு பூஜையுடன் இப்படத்தின் படப்பிடிப்புப் பணிகள் தொடங்கியுள்ளன. பூஜை நிகழ்வில் படக்குழுவினர் மற்றும் முக்கிய நட்சத்திரங்கள் கலந்துகொண்டனர். மக்களுக்கு கிடா விருந்தளித்து, படப்பிடிப்பு பணிகளை துவக்கியுள்ளது படக்குழு.
இந்நிகழ்வினில் நடிகர் வடிவேலு பேசியதாவது…,
மாரநாடு கருப்பண்ணசாமி கோயில் மிகவும் விசேஷமான ஒரு கோயில். இந்த ஊரில் பிறந்த ஒவ்வொருவருமே கருப்பசாமிதான். இவ்வளவு பெரிய கூட்டத்தையும், மக்களின் அன்பையும் பார்க்கும்போது மிகவும் சந்தோஷமாக இருக்கிறது. தனுஷ் சாரின் படத்துக்கான பூஜை இவ்வளவு பெரிய விழாவாக நடைபெறுவது மகிழ்ச்சியாக இருக்கிறது. இதுவே மாநாடு போல இருக்கிறது.
நீண்ட நாட்களுக்குப் பிறகு தனுஷ் சாருடன் இணைந்து நடிக்கும் வாய்ப்பு இந்தப் படத்தின் மூலம் கிடைத்திருக்கிறது. ஏன் இடையில் அவருடன் நடிக்கவில்லை என்று கேட்கலாம். சினிமாவில் சில விஷயங்கள் சரியான நேரத்தில் அமைய வேண்டும். இப்போது இந்த வாய்ப்பு கிடைத்திருப்பது மகிழ்ச்சி.
இந்தப் படம் சாதாரணமான படம் இல்லை. எந்த அரசியல் தாக்கமும் இல்லாத, தனித்துவமான ஒரு படம். இந்தக் கதையைக் கேட்டபோது மிகவும் பெருமையாகவும், ஆச்சரியமாகவும் இருந்தது. இது மிகப்பெரிய வெற்றியைப் பெறக்கூடிய படம் என்று நான் நம்புகிறேன். படத்துக்கு இன்னும் தலைப்பு வைக்கவில்லை; இன்னும் சில நாட்களில் தலைப்பு அறிவிக்கப்படும்.
உங்களுடைய அன்பும் ஆசீர்வாதமும் எங்களுக்கு என்றும் தேவை. இவ்வளவு பெரிய அளவில் வந்து இந்த பூஜையை சிறப்பித்த அனைவருக்கும் என் மனமார்ந்த நன்றியை தெரிவித்துக் கொள்கிறேன்.
நடிகர் எஸ் ஜே சூர்யா பேசியதாவது..,
வழக்கமாக படங்களின் பூஜையை சென்னையில்தான் நடத்துவார்கள். ஆனால், மாரநாடு கருப்பண்ணசாமியின் அருளோடும், உங்கள் அன்புக்கு முன்னாலும் இந்தப் படத்தின் பூஜை நடைபெறுவது மிகவும் சந்தோஷமாக இருக்கிறது. இதற்காக தனுஷ் சார், இயக்குநர் மற்றும் தயாரிப்பு நிறுவனத்துக்கு நன்றி சொல்லிக்கொள்கிறேன்.
தமிழரசன் பச்சமுத்து ஒரு சிறந்த எழுத்தாளர் மற்றும் இயக்குநர். நீண்ட நாட்களுக்குப் பிறகு எழுத்தின் மூலம் சிறந்த உணர்வை உருவாக்கக்கூடிய ஒரு இயக்குநராக இருக்கிறார். ‘லப்பர் பந்து’ படத்திலேயே அவருடைய திறமை உங்களுக்கு தெரிந்திருக்கும். இப்போது தனுஷ் 56 படத்திலும் அவர் பிரமாதமாகப் பணியாற்றியிருக்கிறார். நம்முடைய மண்ணின் கதையை மிகவும் அழகாக உருவாக்கியிருக்கிறார். இந்தப் படத்தை நீங்கள் நிச்சயம் விரும்புவீர்கள். இந்தப் படத்தில் வடிவேலு சார், ப்ரீத்தி முகுந்தன் உள்ளிட்ட நல்ல நடிகர்கள் இருக்கிறார்கள். சாய் அபயங்கர் இசையமைக்கிறார். மிகச் சிறந்த டீம் ஒன்றை தமிழரசன் பச்சமுத்து சார் உருவாக்கியிருக்கிறார்.
கருப்பசாமியின் அருளோடும், உங்கள் அன்போடும் இந்தப் படம் மிகப்பெரிய வெற்றியைப் பெற வேண்டும் என்று நீங்களும் வேண்டிக்கொள்ளுங்கள். படத்தின் பூஜைக்கே இவ்வளவு பெரிய அளவில், மாநாடு போல வந்து ஆதரவு கொடுத்திருக்கும் உங்கள் அனைவருக்கும் எங்களுடைய மனமார்ந்த நன்றி.”
நடிகர் தனுஷ் பேசியதாவது..,
இந்த பூஜை, இன்று பின்னால் இருக்கும் சாமியையும், முன்னால் இருக்கும் உங்களையும் நம்பித்தான் நடைபெறுகிறது. இன்று நான் அதிகம் பேச விரும்பவில்லை. அனைவரும் இங்கு நடைபெறும் கிடா விருந்தில் வயிறார சாப்பிட்டு, பத்திரமாக வீட்டுக்குச் செல்ல வேண்டும்.
விரைவில் ஓம் படத்தின் ஆடியோ லாஞ்சில் உங்களை மீண்டும் சந்திப்பேன். இங்கு வந்து உங்கள் அன்பையும், ஆதரவையும், ஆசீர்வாதத்தையும் வழங்கிய அனைவருக்கும் என் மனமார்ந்த நன்றியைத் தெரிவித்துக் கொள்கிறேன்,” என்றார்.
