விற்பனைப் பிரதிநிதி வேலை என்றாலே இலக்கை அடைய வேண்டிய அழுத்தம், தொடர்ந்து வாடிக்கையாளர்களை அணுக வேண்டிய கட்டாயம் என பல சவால்கள் இருக்கும். இப்படிப்பட்ட பணியில் புதிதாக இணையும் நான்கு இளைஞர்களின் நட்பு, அவர்கள் சந்திக்கும் எதிர்பாராத பிரச்சனை மற்றும் அதிலிருந்து தப்பிக்க அவர்கள் தங்களது தொழில் அனுபவத்தையே ஆயுதமாக பயன்படுத்தும் விதம் ஆகியவற்றை மையமாக வைத்து உருவாகியிருக்கும் படம் ‘கோல்டு கால்’. காமெடியுடன் கூடிய குற்றப் பின்னணியில் பயணிக்கும் இப்படம், விற்பனைப் பிரதிநிதிகளின் வாழ்க்கையை சற்று வித்தியாசமான கோணத்தில் பதிவு செய்கிறது.
பெங்களூரில் உள்ள தனியார் நிறுவனம் ஒன்றில் விற்பனைப் பிரதிநிதி பணியில் சேரும் சித்து மூலிமணி, சந்தோஷ், ஸ்ரீ வைஷ்ணவ் மற்றும் கிருஷ்ணா விஜய் ஆகிய நான்கு இளைஞர்களும் வெவ்வேறு மாநிலங்களைச் சேர்ந்தவர்கள். ஒரே நிறுவனத்தில் பணியாற்றுவதால் நண்பர்களாகும் இவர்கள், விற்பனைப் பிரதிநிதி வேலை எவ்வளவு சிரமமானதாக இருந்தாலும் அதை மகிழ்ச்சியுடன் செய்து வருகிறார்கள்.
ஆனால், நிறுவனம் நிர்ணயித்திருக்கும் இலக்கை அவர்களால் எதிர்பார்த்த அளவுக்கு எட்ட முடியவில்லை. இதனால் மேலதிகாரியின் அதிருப்திக்கும், கடுமையான அழுத்தத்திற்கும் ஆளாகிறார்கள். இந்த சூழலில் தொழிலதிபர் ஒருவரின் மகன் கடத்தப்பட, அந்த சம்பவத்துடன் நான்கு நண்பர்களுக்கும் தொடர்பு இருப்பதாக காவல்துறை சந்தேகிக்கிறது.
கடத்தல் வழக்கில் நான்கு பேரும் குற்றவாளிகளாக சிக்க, அவர்களை பிடிப்பதற்காக காவல்துறை தீவிரமாக தேடுகிறது. தாங்கள் செய்யாத குற்றத்திற்கு பழி சுமத்தப்பட்டிருப்பதை உணரும் நண்பர்கள், காவல்துறையிடம் சிக்காமல் தப்பிப்பதோடு, தங்கள் மீதான குற்றச்சாட்டையும் நிரூபித்து விட வேண்டும் என்று முடிவு செய்கிறார்கள்.
இதற்காக தாங்கள் பணியாற்றும் துறையில் பெற்ற பயிற்சியையும், விற்பனைப் பிரதிநிதிகளாக இருக்கும் அனுபவத்தையும் பயன்படுத்தி உண்மையான குற்றவாளியை கண்டுபிடிக்க முயற்சிக்கிறார்கள். அதே நேரத்தில் கடத்தப்பட்ட சிறுவனையும் மீட்கும் பொறுப்பு அவர்களுக்கு ஏற்படுகிறது. நான்கு நண்பர்களும் இந்த சிக்கலில் இருந்து எப்படி வெளியே வந்தார்கள் என்பதையும், சிறுவனை அவர்களால் காப்பாற்ற முடிந்ததா என்பதையும் காமெடி கலந்து சொல்வது தான் ‘கோல்டு கால்’.
விற்பனைத் துறையில் வாடிக்கையாளர்களை எதிர்பாராத நேரத்தில் நேரடியாக தொடர்பு கொள்வதை ‘Cold Call’ என்று குறிப்பிடுவார்கள். விற்பனைப் பிரதிநிதிகளின் பணியை மையமாக வைத்து கதை உருவாக்கப்பட்டிருப்பதால், படத்திற்கும் பொருத்தமாக ‘கோல்டு கால்’ என்று தலைப்பு வைத்திருக்கிறார்கள்.
கதையின் நாயகர்களாக நடித்திருக்கும் சித்து மூலிமணி, சந்தோஷ், ஸ்ரீ வைஷ்ணவ் மற்றும் கிருஷ்ணா விஜய் ஆகியோர் தமிழ் சினிமாவுக்கு புதுமுகங்களாக இருந்தாலும், தங்களது கதாபாத்திரங்களை புரிந்துகொண்டு நடித்திருக்கிறார்கள். குறிப்பாக கதையின் நான்கு நாயகர்களும் வெவ்வேறு மாநிலங்களை சேர்ந்தவர்களாக இருப்பதால், தமிழகத்தைச் சேர்ந்த ஒருவர், கர்நாடகாவைச் சேர்ந்த ஒருவர், ஆந்திரப் பிரதேசத்தைச் சேர்ந்த ஒருவர் மற்றும் கேரளாவைச் சேர்ந்த ஒருவர் என நடிகர்கள் தேர்வு செய்யப்பட்டிருப்பது கதைக்கு இயல்பான தன்மையை கொடுத்திருக்கிறது.
நான்கு பேருக்கும் தனித்தனியான குணாதிசயங்களை கொடுத்திருப்பதோடு, அவர்களது நட்பை மையமாக வைத்து காட்சிகள் அமைக்கப்பட்டிருப்பதால், ஒவ்வொருவரும் தங்களுக்கான இடத்தை பிடிக்கிறார்கள். காமெடி காட்சிகளிலும், பிரச்சனையை எதிர்கொள்ளும் தருணங்களிலும் நால்வரும் தங்களது பங்களிப்பை சரியாக வழங்கியிருக்கிறார்கள்.
நாயகிகளாக நடித்திருக்கும் அமிதா ரங்கநாதா, நிஷா ஹெக்டே, மேலி லிட்டி மற்றும் கீர்த்தனா புல்கி ஆகியோரும் கதைக்கு தேவையான நடிப்பை வழங்கியிருக்கிறார்கள். தங்களது கதாபாத்திரங்களுக்கு கொடுக்கப்பட்ட காட்சிகளில் இயல்பாக பயணிக்கிறார்கள்.
நிறுவன மேலாளர், விற்பனைப் பயிற்சியாளர் உள்ளிட்ட துணை கதாபாத்திரங்களில் நடித்திருப்பவர்களும் கதைக்கு பொருத்தமான தேர்வாக இருக்கிறார்கள். குறிப்பாக விற்பனைப் பிரதிநிதிகளின் பணிச்சூழலை பிரதிபலிக்கும் வகையில் அவர்களது கதாபாத்திரங்கள் அமைக்கப்பட்டிருப்பதால், நடிப்பிலும் பெரிதாக குறை சொல்ல முடியவில்லை.
ஒளிப்பதிவாளர் சரவணன், கதையின் தேவையை புரிந்துகொண்டு எளிமையான காட்சியமைப்புடன் படத்தை நகர்த்தியிருக்கிறார். பிரணவ் கிரிதரன் இசையில் பாடல்கள் கமர்ஷியல் தன்மையுடன் அமைந்திருப்பதோடு, கேட்கும் வகையிலும் இருக்கின்றன. பின்னணி இசையும் காட்சிகளுக்கு தேவையான அளவில் பயன்படுத்தப்பட்டிருக்கிறது. சுரேஷ் ஆறுமுகத்தின் படத்தொகுப்பு கதையின் வேகத்திற்கு ஏற்ப பயணிக்கிறது.
படத்தை எழுதி இயக்கியிருக்கும் தம்பிதுரை, விற்பனைப் பிரதிநிதி வேலை எப்படி இருக்கும் என்பதை வெறுமனே விளக்கும் படமாக உருவாக்காமல், அந்த பணியில் இருப்பவர்கள் சந்திக்கும் சின்னச் சின்ன சம்பவங்கள், எதிர்பாராத திருப்பங்கள் மற்றும் நண்பர்களுக்குள் உருவாகும் இனிமையான அனுபவங்களை கதையின் முக்கிய பகுதியாக மாற்றியிருக்கிறார்.
குறைந்த வசதிகள் மற்றும் சிறிய பட்ஜெட்டில், விற்பனைத் துறையை மையமாக வைத்து ஒரு முழுமையான கமர்ஷியல் படத்தை கொடுக்க முயற்சித்திருக்கும் இயக்குநர் தம்பிதுரை, காமெடி, நட்பு மற்றும் குற்றப் பின்னணி ஆகியவற்றை சரியான அளவில் கலந்து, தான் சொல்ல வந்த கதையை ஓரளவு நிறைவாக சொல்லி வெற்றி பெற்றிருக்கிறார்.
