தமிழ்நாடு தியேட்டர் உரிமையாளர்களின் அனைத்து சங்கங்களின் சார்பாக திங்கள் கிழமை முதல் அறிவித்துள்ள தியேட்டர்கள் ஸ்டிரைக்கிற்கு தமிழ்த் திரைப்படத் தயாரிப்பாளர்கள் சங்கம் எதிர்ப்பு தெரிவித்துள்ளது.
இது தொடர்பாக தமிழ்த் திரைப்படத் தயாரிப்பாளர் சங்கம் சார்பாக விடுக்கப்பட்டுள்ள அறிக்கையில்,
சினிமாத் துறை தற்போது இக்கட்டான சூழ்நிலையில் இருப்பது அனைவரும் அறிந்ததே. இப்பொழுது அமலுக்கு வந்திருக்கும் ஜிஎஸ்டி மற்றும் கேளிக்கை வரியால் சினிமாத் துறை மேலும் குழப்பமான சூழ்நிலையில் சிக்கியுள்ளது.
இந்நிலையில் தன்னிச்சையாக முடிவெடுத்து திரையரங்க உரிமையாளர்கள் சங்கம் சார்பாக வருகிற 3ம் தேதி முதல் வேலை நிறுத்தம் அறிவிக்கப்பட்டுள்ளது. இந்த முடிவினை எடுக்கும் முன்பு அனைத்து தயாரிப்பாளர்களின் நிலைமையை உணர்ந்து செயல்பட்டிருந்தால் மிகவும் நன்றாக இருந்திருக்கும்.
தயாரிப்பாளர்கள் நலனுக்காகத்தான் நாம் அனைவரும் பாடுபட்டுக் கொண்டிருக்கிறோம். ஆனால், 20 தயாரிப்பாளர்கள் முற்றிலுமாக பாதிக்கப்படும் வகையில் ஒரு முடிவை எடுப்பது என்பது தயாரிப்பாளர்கள் சங்கம் உடன்படாத விஷயம்.
மாநில அரசுக்கு நம் தேவைகளைப் புரிந்து நடவடிக்கை எடுப்பதற்கு கால அவகாசம் தரவேண்டிய தேவையும் உள்ளது. இதனை பொருட்டில் கொண்டு வருகிற திங்கள் முதல் அறிவிக்கப்பட்டிருக்கும் வேலை நிறுத்தத்திற்கு தயாரிப்பாளர்கள் சங்கம் உடனடியாக ஆதரவு அளிக்க இயலாது என்பதைத் தெரிவித்துக் கொள்கிறோம்.
மேலும் தயாரிப்பாளர்கள் சங்க உறுப்பினர்கள் மற்றும் திரைத்துறையினர் பலரும் கேட்டுக் கொண்டதற்கிணங்க திரையரங்கு உரிமையாளர்கள் சங்கம் தற்போது அறிவித்துள்ள வேலை நிறுத்தத்தினை மறுபரிசீலனை செய்ய வேண்டுமாய் தயாரிப்பாளர்கள் சங்கத்தின் சார்பாக அன்புடன் வலியிறுத்துகிறோம்,” என்று அந்த அறிக்கையில் தெரிவித்துள்ளார்கள்.
