ஜின் த பெட் - விமர்சனம்

பழங்காலத்தில் மந்திரவாதிகளால் உருவாக்கப்பட்ட ஜின்கள் – சில நல்லவை, சில தீயவை. நல்ல ஜின்கள் மன்னர்களின் பாதுகாவலர்களாக இருந்ததோடு, மக்களுக்கு நன்மைகளும் செய்தன. ஆனால், காலம் கடந்து இன்று அந்த ஜின் ஒன்று ஒரு சாதாரண மனிதனின் கைகளில் வந்துவிட்டால் என்ன நடக்கும்? இதுதான் ‘ஜின்’ படத்தின் அடிப்படைக் கருத்து.  

முகேன் ராவ் ஒரு பழைய பெட்டியில் இருந்து வெளிப்படும் ஜினைக் கண்டறிகிறார். அந்த ஜின் அவரது வாழ்வில் நல்ல மாற்றங்களை ஏற்படுத்துகிறது – காதல், திருமணம், இசைத் தொழில், எல்லாமே சிறப்பாக அமைகின்றன. ஆனால், அவரது மனைவி (பவ்யா ட்ரிகா) மருத்துவமனையில் அனுமதிக்கப்படும் வரை, பல தீய சம்பவங்கள் நிகழ்கின்றன. இதற்கு ஜினே காரணம் எனக் கருதிய முகேன் அதைத் தள்ளியவுடன், பிரச்சனைகள் மேலும் பெருகுகின்றன. ஜின் அவரை விடாமல் துரத்துகிறது. இதற்கிடையே, ஜின் பற்றிய ஒரு மர்மமும், அது அவரது மனைவியைத் தாக்கியதற்கான உண்மையும் வெளிப்படுகின்றன.  

 முகேன் ராவ் நாயகனாக நடித்திருந்தாலும், அவரது நடிப்பு வலுவாக இல்லை. கோபம், காதல், நகைச்சுவை போன்ற உணர்ச்சிகளை சரியாக வெளிக்காட்டாமல், சிரிப்பால் மழுப்பியிருக்கிறார்.   பவ்யா ட்ரிகா குறைந்த ஸ்கிரீன்டைமில் அதிகம் செய்ய முடியவில்லை. பெரும்பாலான காட்சிகளில் கோமாவில் இருந்தாலும், கிளைமாக்ஸில் சில முக்கியமான நிமிடங்களை நன்றாகக் கையாண்டிருக்கிறார்.   ராதாரவி ஒரு சக்திவாய்ந்த வில்லனாகத் திகழ்ந்திருக்கிறார். அவரது அனுபவம் தெரியும் நடிப்பு படத்திற்கு ஒரு அடையாளம் சேர்த்துள்ளது.   இமான் அண்ணாச்சி (நாயகனின் தந்தை வேடம்) பொருத்தமற்ற தோற்றத்துடன் நடித்திருப்பது கவனத்தை ஈர்க்கவில்லை.   பாலசரவணன் சில நகைச்சுவைக் காட்சிகளில் பார்வையாளர்களை சிரிக்க வைக்கிறார்.  

ஒளிப்பதிவு (அர்ஜுன் ராஜா) ஆரம்பக் காட்சிகள் கவர்ச்சியாக இருந்தாலும், படம் முன்னேறும்போது கலர் டோன்கள் சலிப்பை ஏற்படுத்துகின்றன.  இசை (விவேக்-மெர்வின் பாடல்கள் மற்றும் பின்னணி இசை சுமாரான தரத்தில் உள்ளன.  

இயக்குனர் டி.ஆர். பாலா‘பட்டணத்தில் பூதம்’, போன்ற பழைய பூதப் படங்களின் ரீதியில், ‘ஜின்’ என்ற புதிய வடிவத்தை அறிமுகப்படுத்தியிருக்கிறார். ஜின்களின் தோற்றம் மற்றும் பின்னணிக் கதை ஓவியங்களாக அழகாக விவரிக்கப்பட்டுள்ளது. ஆனால், இரண்டாம் பாதியில் கிராபிக்ஸ் ஜின் கதாபாத்திரம் மிகவும் பலவீனமாக உள்ளது. கதையோடு ஒட்டாத அதன் செயல்கள் படத்தின் ஓட்டத்தைக் குழப்புகின்றன.  

‘ஜின்’ ஒரு சாதாரண ஹாரர்-ஃபேண்டஸி டிராமா. சில சுவாரஸ்யமான காட்சிகள் இருந்தாலும், மொத்தத்தில் படம் ஒரு கலவையான அனுபவத்தைத் தருகிறது. கிராபிக்ஸ் மற்றும் இரண்டாம் பாதியின் தளர்வான கதைப்போக்கு படத்தின் தாக்கத்தைக் குறைக்கிறது.