சொர்க்கவாசல் - விமர்சனம்

சித்தார்த் விஸ்வநாத் இயக்கத்தில், கிறிஸ்டோ சேவியர் இசையமைப்பில், ஆர்ஜே பாலாஜி, கருணாஸ், நட்டி, ஷராப் யு தீன், சானியா ஐயப்பன் மற்றும் பலர் நடித்துள்ள படம்.

1999ஆம் ஆண்டு சென்னை மத்திய சிறைச்சாலையில் நிகழ்ந்த உண்மை சம்பவத்தை மையமாகக் கொண்டு கற்பனையுடன் உருவாக்கப்பட்டுள்ளது. அந்தக் காலகட்டத்தில் நடந்த சிறை கலவரம், துணை ஜெயிலரின் கொலை, மற்றும் காவல்துறையினர் சுட்டதில் நிகழ்ந்த மரணங்கள் போன்றவை கதையின் முக்கிய சம்பவங்களாக இடம் பெற்றுள்ளது. படத்தின் திரைக்கதையில் சிறை கண்காணிப்பாளர், காவலர்கள், கைதிகள், அவர்களுக்குள் உள்ள கோஷ்டிகள், அப்பாவியான கைதிகள் ஆகியோரின் வாழ்க்கையை நுணுக்கமாக பதிவு செய்யப்பட்டுள்ளது.

செய்யாத கொலைக்காக குற்றவாளியாக குற்றம் சாட்டப்பட்டு சிறையில் அடைக்கப்படுகிறார் ஆர்ஜே பாலாஜி. அவரது அப்பாவித்தனமான தோற்றமும், செயற்கையாக இல்லாத நடிப்பும் படத்திற்குப் பலமாக இருக்க உதவுகிறது. ரவுடி சிகாமணி கதாபாத்திரத்தில் செல்வராகவனின் நடிப்பும், அவரது உடல்மொழியும், அதிகாரத்தை வெளிப்படுத்தும் குரலும் மிரட்டலாகவே அமைந்துள்ளது. அவரையும் ஒரு ரவுடி என நம்மை நம்ப வைக்கிறது..

விசாரணை கமிஷன் நீதிபதியாக நடித்து நட்டி தனது கதாபாத்திரத்தில் இயல்பாய் நடித்துள்ளார். சிறையின் துணை ஜெயிலராக கருணாஸ் மற்றும் ஜெயிலராக ஷராப் யுதீன் அவர்களுக்குரிய கதாபாத்திரங்களில் முழுமையாக பொருந்தியுள்ளனர். பல துணை கதாபாத்திரங்களின் மூலம், சிறைக்குள் பரவலாக காணப்படும் பல்வேறு மனோநிலைகளை படம் வெளிப்படுத்துகிறது.

திரைக்கதையின் மையம், கலவரம் எதற்காகத் தொடங்கியது மற்றும் அதன் விளைவுகள் என்பதையே விளக்குகிறது. ஆனால் கதையின் எழுத்து, “விருமாண்டி” போன்ற படங்களில் முன்பு பார்த்தவை போன்று இருந்தாலும், காட்சிப்படுத்தலின் சுவாரசியத்தால் அது தனித்தன்மையை பெற்றுள்ளது. சிறைச்சாலைக்குள் கலவரத்தை காட்சிப்படுத்திய விதம், பிரின்ஸ் ஆண்டர்சன் ஒளிப்பதிவு சம்பவங்களை நேரில் பார்த்தது போன்ற உணர்வை ஏற்படுத்துகிறது.

கிரிஸ்டோ சேவியரின் பின்னணி இசை காட்சிகளுக்கு பெரும் ஊக்கம் அளித்தாலும், வசனங்கள் சில இடங்களில் கேட்கப்படாமலே போய்விடுகின்றன. தினேஷ் சுப்பராயனின் சண்டைக்காட்சிகள் மிக இயல்பாக உருவாக்கப்பட்டுள்ளன. 

"சொர்க்கவாசல்" வித்தியாசமான கதை, மேக்கிங் நுணுக்கம், மற்றும் உணர்ச்சிபூர்வமான கதாபாத்திரங்களின் மூலம் சிறந்த முயற்சியாக அமைந்துள்ளது. கதையில் சில இடங்களில் அழுத்தம் குறைந்தாலும், திரைப்படத்தின் முழுமையான வடிவமைப்பு பார்வையாளர்களை ஈர்க்கும் வகையில் உள்ளது.