பராரி - விமர்சனம்

திருவண்ணாமலை மாவட்டத்தில் உள்ள ஒரு கிராமத்தின் சூழலுடன் தொடங்கும் இந்தப் படம், அங்கே வாழும் ஆதிக்க சாதி மற்றும் ஒடுக்கப்பட்ட சாதி மக்களுக்கிடையேயான உறவை மையமாகக் கொண்டு சமூக அரசியலை ஆராய்கிறது. இரு சாதி மக்களும் ஒரே குலதெய்வத்தை வழிபட்டாலும், அவர்களுக்கிடையே நிலவும் சண்டைகள் சாதிய பாகுபாட்டின் வெளிப்பாடாகவே தெரிகின்றன.

இந்த கதை, தமிழ்நாட்டில் மட்டும் இல்லாமல் இந்தியா முழுவதும் சமூக வாழ்வில் சாதி, இன, மொழி போன்ற காரணிகளால் ஏற்படும் பிரச்சனைகளுக்கு வெளிச்சம் போட்டுக் காட்டுகிறது.

உள்ளூரில் சாதிய அடக்குமுறை நடப்பதை எடுத்துரைக்கும் இப்படம், தமிழர்கள் கர்நாடகாவில் வேலைக்காக சென்று அங்கு கன்னட அமைப்புகளால் சந்திக்கும் எதிர்ப்பையும் வெளிப்படுத்துகிறது.

திருவண்ணாமலை கிராமத்தில் நடைபெறும் நிகழ்வுகள் முதல் பெங்களூருவின் தொழிற்சாலை சூழல் வரை படத்தின் திரைக்கதை நகர்கிறது. இரண்டு சாதி மக்களும் வேலைக்காக ஒரு ஜூஸ் பேக்டரியில் செல்வது, அங்கு தமிழர்-கன்னடர் மோதலுக்கு வழிவகுப்பது போன்ற சம்பவங்களின் பின்னணியில் உள்ள அரசியல் உணர்வுபூர்வமாக சொல்லப்பட்டுள்ளது.

நாயகன் ஹரிசங்கர் மற்றும் நாயகி சங்கீதா கல்யாணின் நடிப்பு, சமூக உணர்வை பரப்புவதற்கு முக்கியம். ஹரிசங்கரின் எப்போதும் அமைதியாகக் கடந்து போகும் குணமும், தேவையான நேரத்தில் வெடிக்கும் ஆக்ரோஷமும் பார்வையாளர்களின் மனதை ஆட்கொள்கின்றன. சங்கீதா தனது கேரக்டரில் கிராமத்து பெண்ணின் எளிமையையும் வலிமையையும் காட்டியுள்ளார்.

இயக்குனர் எழில் பெரியவேடி, சாதிய அடக்குமுறையின் அரசியலை தைரியமாகச் சொல்லியுள்ளார். படம் தொடங்கியவுடன் சாதிய வன்மத்தை நேரடியாகக் காட்சிப்படுத்துவதில் எந்த தயக்கமும் காட்டாமல், அதன் பின்னணியில் உள்ள அரசியலை வெளிச்சம் போட்டு காட்டுகிறார். ஆனால் சில இடங்களில், வன்மம் தேவையற்ற அளவுக்கு மிகைப்படுத்தப்பட்டு காட்டப்படுகிறதோ என்ற எண்ணமும் வருகிறது.

ஒளிப்பதிவாளர் ஸ்ரீதர், திருவண்ணாமலை கிராமத்தின் இயற்கை மற்றும் பெங்களூருவின் தொழிற்சாலை சூழலை உணர்ச்சிபூர்வமாக படமாக்கியுள்ளார். ஷான் ரோல்டனின் பின்னணி இசை கதையின் ஆழத்தை அதிகரிக்கிறது.

பராரி, சாதி மோதல்களுக்கான அரசியலை வெளிப்படையாக ஆராய்ந்திருப்பது மட்டுமல்லாமல், தமிழ்நாட்டின் உள்ளூர் பிரச்சனைகளில் இருந்து மாநில எல்லைகளைத் தாண்டி நிகழும் பிரச்சனைகளை பார்க்க வைக்கிறது. சாதி, மொழி, இனம் போன்ற பாகுபாட்டின் விளைவுகளை நுணுக்கமாக வெளிப்படுத்தும் இப்படம், சமூக அரசியலின் முக்கியத்துவத்தை யோசிக்க வைக்கிறது.

இயக்குநரின் முதல் முயற்சி என்றாலும், அவரது பாணி, சமூகத்தில் உள்ள கோணங்களைக் காட்சியமைப்பின் மூலம் தெளிவாக எடுத்துரைப்பதில் வெற்றி அடைந்துள்ளது.