பிரபாஸுக்கு நாயகியாகும் மிருணாள் தாகூர்

பிரபாஸ் நடிக்கவுள்ள படத்தின் நாயகியாக மிருணாள் தாகூர் ஒப்பந்தம் செய்யப்பட்டுள்ளார்.

நாக் அஸ்வின் இயக்கத்தில் பிரபாஸ், அமிதாப் பச்சன், கமல்ஹாசன், தீபிகா படுகோன் உள்ளிட்ட பலர் நடிப்பில் வெளியான படம் ‘கல்கி 2898 ஏடி’. வைஜெயந்தி மூவிஸ் நிறுவனம் தயாரித்த இந்தப் படம் மாபெரும் வரவேற்பைப் பெற்றது. உலகளவில் மொத்த வசூலில் 1100 கோடியை தாண்டிவிட்டது.

இந்த வெற்றியைத் தொடர்ந்து தனது அடுத்த படத்தின் பணிகளைத் தொடங்குகிறார் பிரபாஸ். இதனை ‘சீதாராமம்’ படத்தினை இயக்கிய ஹனு ரவிபுடி இயக்கவுள்ளார். மைத்ரி மூவி மேக்கர்ஸ் நிறுவனம் பெரும் பொருட்செலவில் தயாரிக்கவுள்ளது.

இதில் நாயகியாக நடிக்க மிருணாள் தாகூர் ஒப்பந்தம் செய்யப்பட்டுள்ளார். இதன் படப்பிடிப்பு இந்த மாதம் இறுதியில் தொடங்குகிறது. இதற்காக பிரம்மாண்ட அரங்குகள் அமைக்கும் பணிகள் நடைபெற்று வருகின்றன. முழுக்க போர் பின்னணியில் இந்தக் கதையினை உருவாக்கி இருக்கிறார் ஹனு ரவிபுடி.

முன்னதாக ஹனு ரவிபுடி இயக்கத்தில் வெளியாகி மாபெரும் வரவேற்பு பெற்ற ‘சீதா ராமம்’ படத்தின் நாயகியும் மிருணாள் தாகூர் தான் என்பது குறிப்பிடத்தக்கது.