மாநாடு - 6 நிமிடக் காட்சியை ஒரே டேக்கில் நடித்த சிலம்பரசன்

வி ஹவுஸ் நிறுவனம் சார்பில் சுரேஷ் காமாட்சி தயாரிப்பில், வெங்கட் பிரபு இயக்கத்தில், யுவன்ஷங்கர் ராஜா இசையமைப்பில், சிலம்பரசன், கல்யாணி பிரியதர்ஷன் நடித்து வரும் படம் ‘மாநாடு’.

எஸ்.ஜே.சூர்யா முக்கிய வேடத்தில் நடிக்க  மற்றும் ஒய்.ஜி.மகேந்திரன், வாகை சந்திரசேகர், எஸ்ஏ சந்திரசேகர், அஞ்சனா கீர்த்தி, உதயா, மனோஜ் கே. பாரதி, பிரேம்ஜி, கருணாகரன், மகத்,  டேனியல் போப்,  உள்ளிட்ட பலர் நடிக்கின்றனர். 

அரசியல் பின்னணியில் உருவாகி வரும் இந்தப்படத்தில் அப்துல் காலிக் என்கிற கதாபாத்திரத்தில் சிலம்பரசன் நடித்து வருகிறார். 

இப்படத்தின் படப்பிடிப்பு தற்போது சென்னை மற்றும் அதன் சுற்றுப்புறங்களில் தொடர்ந்து நடைபெற்று வருகிறது. 

நேற்றைய படப்பிடிப்பின்போது, சிலம்பரசன், கல்யாணி பிரியதர்ஷன், எஸ்.ஜே.சூர்யா, பிரேம்ஜி, கருணாகரன் உள்ளிட்டோர் நடிக்கும் காட்சியை படமாக்கினார் வெங்கட் பிரபு. படத்தின் மிக முக்கியமான, கிட்டத்தட்ட ஆறு நிமிடம் கொண்ட இந்த காட்சியில், ஒரே டேக்கில் நடித்து அசத்தினாராம் சிலம்பரசன். 

சிலம்பரசன் சிங்கிள் டேக் நடிகர் என்பது அனைவரும் அறிந்ததுதான், ஆனால் ஆறு நிமிடக் காட்சியைக் கூட, ஒரே டேக்கில் அவர் நடித்து முடித்ததைக் கண்டு அசந்துபோன படக்குழுவினர், காட்சி படமாக்கப்பட்டு முடித்ததும் உடனே கைதட்டல் மூலமாக சிலம்பரசனுக்கு தங்களது பாராட்டுக்களைத் தெரிவித்துள்ளனர்.