யாதும் அறியான் - விமர்சனம்

யாதும் அறியான்’ ஒரு புதுமையான சைக்கோ திரில்லர், இது காதல், துரோகம், மர்மம் மற்றும் நேரப் பயணத்தின் கலவையாக பார்வையாளர்களை மகிழ்விக்கிறது. எளிய கதைக்களத்தை எடுத்து, எதிர்பாராத திருப்பங்களுடன் பரபரப்பான அனுபவத்தை வழங்குகிறது இப்படம்.

தினேஷ் மற்றும் பிரானா காதலர்களாக உள்ளனர். தன் காதலியுடன் நெருக்கமாக இருக்க விரும்பும் தினேஷுக்கு, பிரானாவின் பிடிவாதமான மறுப்பு ஏமாற்றத்தை அளிக்கிறது. நண்பரின் ஆலோசனையை ஏற்று, இரு ஜோடிகளும் ஒரு தனிமையான வனப்பகுதியில் உள்ள சொகுசு விடுதிக்கு செல்கின்றனர். அங்கு அப்புக்குட்டி விடுதி ஊழியராக தோன்றுகிறார். தினேஷின் முயற்சிகள் வெற்றி பெற, பிரானாவுடன் நெருக்கமாகிறார். ஆனால், இந்த மகிழ்ச்சி நீடிக்கவில்லை. பிரானாவின் எதிர்பாராத செயல், நண்பர்களின் துரோகம், மற்றும் 2024இல் இருந்து 2026ஆக நேரம் மாறுவது என தொடர்ச்சியான அதிர்ச்சிகள் தினேஷை தாக்குகின்றன. இந்த மர்மங்களின் பின்னணியை வெளிப்படுத்துவதே படத்தின் மையம்.

அறிமுக நாயகன் தினேஷ், அப்பாவி முகத்துடன் தொடங்கி, இரண்டாம் பாதியில் கொஞ்சம் சைக்கோத்தனத்தைக் காட்டுகிறார். நடிப்பில் இன்னும் முன்னேற்றம் தேவை. கதாநாயகி பிரானா, ஆனந்த் பாண்டி, ஷ்யாமல் மற்றும் அப்புக்குட்டி ஆகியோர் தங்கள் பாத்திரங்களில் அளவாக நடித்துள்ளார்கள்.

ஒளிப்பதிவாளர் எல்.டி, வனப்பகுதியில் உள்ள பழைய விடுதியை பயமுறுத்தும் வகையில் அழகாக படம்பிடித்திருக்கிறார். ஒரு அறையில் நடக்கும் முக்கிய காட்சிகளை நேர்த்தியாக வடிவமைத்திருக்கிறார். இசையமைப்பாளர் தர்ம பிரகாஷின் பின்னணி இசை, திரில்லர் காட்சிகளின் பதற்றத்தை உயர்த்தி, படத்திற்கு உயிர் கொடுக்கிறது. பாடல்களும் கதையுடன் பொருந்தி பயணிக்கின்றன.

இயக்குநர் எம்.கோபி, ஒரு எளிய கதையை எடுத்து,  2024இல் தொடங்கி 2026இல் பயணிக்கும் கதைக்களம், பார்வையாளர்களை கவர்கிறது. ஆரம்பத்தில் நாயகன் மருத்துவரிடம் பேசும் காட்சி, இறுதி திருப்பத்தை முன்கூட்டியே வெளிப்படுத்துவது சற்று பலவீனமாக இருந்தாலும், நண்பர்களைச் சுற்றிய மற்றொரு மர்மம் படத்தை சுவாரஸ்யமாக முடித்து, இரண்டாம் பாகத்திற்கு எதிர்பார்ப்பை உருவாக்குகிறது.

‘யாதும் அறியான்’ ஒரு நல்ல திரில்லர் ஆக வேண்டிய திறனை கொண்டிருந்தாலும், குழப்பமான திரைக்கதை, சுமாரான நடிப்பு என கொஞ்சம் தட்டுத் தடுமாறுகிறது.