சிவகார்த்திகேயன் நடிக்கும் ‘டான்’

தமிழ்த் திரையுலகின் முன்னணி கதாநாயகர்களில் ஒருவரான சிவகார்த்திகேயன் தற்போது ‘டாக்டர், அயலான்’ ஆகிய படங்களில் நடித்து வருகிறார். இந்த வருடத்தில் இவ்விரண்டு படங்களும் வெளியாக உள்ளன.

இதற்கடுத்து சிவகார்த்திகேயனின் 19வது படமாக ‘டான்’ படம் உருவாக உள்ளது.

லைக்கா புரொடக்ஷன்ஸ், சிவகார்த்திகேயன் புரொடக்ஷன்ஸ் இணைந்து தயாரிக்கும் இப்படத்தில் சிபிசக்கரவர்த்தி இயக்குனராக அறிமுகமாகிறார். ‘மெர்சல், பிகில்’ படங்களை இயக்கிய அட்லியிடம் உதவி இயக்குனராகப் பணியாற்றியவர் சிபி.

இப்படம் பற்றி லைக்கா புரொடக்ஷன்ஸ் சுபாஷ்கரன் கூறுகையில், 

“தமிழின் மிக முக்கிய நடிகர், பாக்ஸ் ஆபிஸ் வசூல் நாயகனான,  சிவகார்த்கிகேயனுடன் இணைந்தது, மிகப் பெரும் மகிழ்ச்சி.  அவரது அடுத்த படங்கள் (டாக்டர் & அயலான்) 2021ம் வருடத்தின் ரசிகர்களின் எதிர்பாப்பில் முதன்மை இடத்தை பெற்ற படங்கள் என்பதில் எந்த் சந்தேகமுமில்லை. அப்படங்கள் கண்டிப்பாக திரையரங்குகளுக்கு பெரும் ரசிகர் பட்டாளத்தை அழைத்து வரும். 

ஒவ்வொரு படத்திலும் நடிகர் சிவகார்த்திகேயன் தன்னை அடுத்த உயரத்திற்கு உயர்த்திக் கொள்ள, உழைக்கும் உழைப்பு, அர்ப்பணிப்பு அபாரமானது.  

‘டான்’ எங்கள் இருவருக்கும் மிக முக்கியமானதொரு படமாக இருக்கும். இயக்குநர் சிபி சக்கரவர்த்தி இப்படத்தின் கதையைக் கூறியது மகிழ்ச்சியான அனுபவமாக இருந்தது. கதையில் பல காட்சிகளில் நகைச்சுவை மிளிர்ந்ததை உணர்ந்தேன். இப்படத்தில் ரசிகர்கள் 100 சதவீதம் உற்சாகமான  காமெடி கலாட்டாவான அனுபவத்தை பெற்று மகிழ்வார்கள் என்பது உறுதி. 

அனிருத் அவர்களின் இசை படத்திற்குக் கிடைத்திருக்கும் மற்றுமொரு பலம். சிவகார்த்திகேயனுடனான அவரது கூட்டணி,  இதுவரை பிரம்மாண்ட வெற்றியினை  மட்டுமே தந்துள்ளது. அவர்களது கூட்டணியில் மீண்டும் ஒரு அற்புதமான ஆல்பத்தை கேட்க ஆவலாக உள்ளேன்,” என்றார்.

இப்படத்தில் பணியாற்ற முன்னணி நடிகர்கள் மற்றும் தொழில்நுட்ப கலைஞர்களிடம் பேச்சுவார்த்தை நடந்து வருகிறது. அதற்கான அறிவிப்புகள் மிக விரைவில் வரும்.